Suaña Meyor discu y canción folk 2010
Salia Meyor discu y canción folk 2005.
Mándanos un corréu a contautu@corquieu.com y mandámostelu a casa.
17'00€ (gastos d'unvíu incluyíos. Preciu pa unvíos a España)
Los dos discos 27'00 €
El grupu Corquiéu entama l’andar musical nel añu 1997 en Ribeseya, d’aquella la formación taba formada por cinco miembros que xuncieron los sos estremaos gustos musicales. Iván Vega (flauta traviesu de madera), Pablo Valdés (guitarra acústica), Roberto Suárez, (Gaita asturiana en sib y la) y David Mateos (Bodhran y caxón) entamen a montar un repertoriu sofitáu en temes tradicionales asturianos y composiciones propies.
Nel branu del añu 1998 danse a conocer na “Folixa riosellana de la sidra” ente abondu públicu pa entamar una ringlera conciertos pel conceyu Ribeseyanu destacando’l conciertu entamáu nes Fiestes de San Miguel en “El Covayu”. Darréu d’estos conciertos, el grupu plantégase la grabación d’una maqueta p’asoleyar les canciones compuestes nesti periodu.
Nel añu 2000, aporta Gema García al grupu, lo que supón un nuevu finxu nel grupu qu’entama un repertoriu nuevu que se sofita en temes cantaos ya instrumentales, siendo’l famosu filólogu asturianu Xandru Martino Ruz, l’encargáu de pone-y lletra a la voz de Gema.
Esti mismu añu y tres de tocar abondos conciertos per toa Asturies, el grupu graba dos temes de criación propia nun discu recopilatoriu de grupos asturianos nuevos: “Xeneración folk” col sellu discográficu L’Aguañaz, recibiendo l’aplausu incondicional del publicu.
N’avientu del añu 2001 Corquiéu asoleya’l so esperáu discu “La Barquera” col sellu discográficu L’Aguañaz, nel qu’aconceyen 11 temes, la mayor parte composición de so que lleva un pieslle esperimental. Aporta al grupu’l vigulineru asturianu Rubén Bada. Nesti discu, Corquiéu amiesta tendencies d’anguaño col so particular estilu folk. Con esti discu, el grupu sopelexa el so frescor y la so calidá na interpretación, siendo quien a alcontrar un furacu nel panorama folk asturianu. Los conciertos per Asturies y España van de siguío con acoyida cada vuelta mayor.
Nel 2002 Corquiéu participa nel prestixosu Festival Intercélticu de Lorient (Bretaña) faciendo dos conciertos representando a la música folk asturiana y amosando un direutu dinámicu y la so calidá, en teniendo en cuenta la rempuesta del abondosu públicu y la importante venta discos.
Nel añu 2003, el grupu desendolca la so primer xira per Hungría, Chequia, y Eslovaquia, nos sos cabezaleros festivales (Beltine festival de Bratislava y y Gyor, Fono club de Budapest, festival de Praga). En mayu d’esi añu aporta al grupu el vigulineru asturianu Frankie Delgado, perconocíu miembru fundador del grupu asturianu Beleñu y por grabar col grupu Húngaru Fianna. Esti mesmu añu, el grupu participa nun de los festivales más famosos d’Europa, en Dinamarca (Tonder Folk Festival) tocando cinco conciertos y compartiendo cartel colos grupos más prestixosos del mundu. (Flook, Altan, Wolfstone, Shooglenifty, Zar, The Cootars, Chip Tylor, Karen Casey etc) recibiendo los aplausos de la crítica del festiva, prensa y públicu y siendo’l grupu revelación del festival.
Nel añu 2004 siguen los viaxes per Europa destacando la participación nel Festival de “Les Anhinoises” en Liege (Bélxica) y el Festival del les islles Shettland (Escocia) au toquen cinco conciertos. En branu aporta al grupu el flautista navetu Xurde Fernández y el grupu desendolca la so primer xira pel norte d’Italia nel ciclu de conciertos Andar per Música (Arenzano en Génova, Montorio Veronesse en Verona, Pedrengo en Bergamo y Arzignano en Vicenza). En payares, xira per Holanda actuando nos principales teatros (Hoogeveen, Den Helder, An till, Leen Warden).
A lo cabero d’esi añu, el grupu recibe un premiu pol so llabor d’espardimientu de la música asturiana per Europa, entamáu pol departamentu de migración del Gobiernu d’Asturies.
Darréu del éxitu del primer discu “La Barquera”, Corquiéu graba’l so segundu discu “Salia” col sellu “Tierra discos” de Xixón nel que s’acolumbra la evolución musical del grupu demientres los años anteriores.
Nesti discu atópense 12 temes de criación propia, nos que se mecen el dulzor de la voz de Gema y la enerxía de los temes instrumentales. Vitalidá, enerxía, dinamismu y dulzor son les pallabres que definen esti trabayu. La producción executiva ta fecha por Corquiéu. El productor musical ye Igor Medio del grupu Felpeyu y como téunicu de soníu, el perconocíu productor escocés Grant Milne (Capercaillie, Tannahill Weaves, Alasdair Fraser, etc.). Tamién echaron un gabitu los músicos asturianos Ramón G. Morán (teclaos) y Horacio A. García (contrabaxu y baxu eléctricu).
Nel branu del 2005 faen la so segunda xira per Italia, mentanto, nun paren los conciertos per España, destacando’l festival llaniscu “Llanes al cubo”.
Nel entamu del añu 2006 Corquiéu recibe los premios AMAS de la música asturiana nes categoríes de Meyor discu folk 2005 por “Salia” y Meyor canción folk por “Ribeseyana”. Tamién reciben el so segundu reconocimientu pol so llabor de difusión de la música asturiana. En Marzu participen na 7ª Nueche Celta de Atter, Luxemburgo, compartiendo cartel con Alan Stivel teniendo un ésitu pergrande y una venta de discos espectacular.
Cola so xira “SALIA” de conciertos actúen en Normandía ya Italia, amás de conciertos per Asturies y España nes sos cites más importantes. Amosar la incorporación al grupu de la vigulinera lleonesa Blanca Sáenz de Miera, el flautista mierense Dani Álvarez y el bouzuquista Jorge Ibáñez que completen la formación de güei con un sofitu sólidu nos aspeutos vocal, rítmicu y melódicu siendo una de les principales bandes del folk.
Nel mes d'abril del 2010, presenta con gran éxitu nel Teatru Filarmónica d'Uviéu el so tercer discu "Suaña".
Nel añu 2011 nomínen el discu Suaña n'estremaes estayes de los premios:
Meyor Cantar n'Asturianu de la Conseyería de Cultura, Meyor discu y Meyor Canción Folk de los Premios AMAS y delles estayes de los Premios Nacionales dela Música.
Consiguen los premios AMAS de Meyor Discu folk y Meyor Canción Folk, siendo el grupu los vencedores morales de los premios.